Mae’r adroddiad hwn yn darparu amcangyfrifon o’r swm a’r mathau o wastraff bwyd a diod a gynhyrchwyd gan gartrefi Cymru yn 2021/22. Edrycha’r adroddiad hefyd ar y rhesymau dros daflu, y gost ariannol, a’r allyriadau nwyon tŷ gwydr (NTG) sy’n gysylltiedig â bwyd wedi’i wastraffu.
Pam mae’r canfyddiadau hyn yn bwysig?
- Bydd gwastraff bwyd yn chwarae rhan allweddol yn y gwaith o gyflawni’r targedau sydd wedi’u gosod gan Lywodraeth Cymru i fod yn ddiwastraff a chyrraedd allyriadau carbon sero net erbyn 2050.
- Mwy nag Ailgylchu yw’r glasbrint ar gyfer yr economi gylchol yng Nghymru sy’n cynnwys ymrwymiad strategol i darged nad yw’n rhwymol i leihau gwastraff bwyd osgoadwy i 50% o lefelau 2007 erbyn 2025, a lleihad o 60% erbyn 2030.
Faint o wastraff bwyd a gynhyrchir gan gartrefi?
- Cynhyrchwyd cyfanswm (rhannau bwytadwy ac anfwytadwy) o 309,000 o dunelli o wastraff bwyd o gartrefi yng Nghymru yn 2021/22. Ar gyfartaledd, mae hyn yn 100kg y pen ar gyfer y flwyddyn honno, neu’n 230kg fesul aelwyd.
- O’r cyfanswm gwastraff bwyd o’r cartref, dosbarthwyd 75% ohono fel rhannau bwytadwy, sef bwyd a fwriadwyd i bobl ei fwyta.
Beth yw effeithiau amgylcheddol gwastraff bwyd cartrefi?
Roedd yr allyriadau nwyon tŷ gwydr (NTG) a oedd yn gysylltiedig â bwyd a diod a wastraffwyd (h.y. rhannau bwytadwy) yng Nghymru’n cyfrif am oddeutu 950,000 o dunelli cyfatebol i CO2 yn 2021/22.
Faint mae taflu’r bwyd hwn yn ei gostio i ni?
Cyfanswm y gost ariannol i aelwydydd Cymru o fwyd a diod a wastraffwyd yn 2021/22 oedd £786,000,000, neu £250 y pen neu £580 fesul aelwyd gyfartalog.
Beth yw’r prif resymau dros wastraffu bwyd?
Cafodd 19% o'r holl fwyd ei wastraffu oherwydd ei fod yn arogli neu'n edrych yn hen a 14% oherwydd ei fod wedi mynd heibio'r dyddiad ar y label. Gellir dosbarthu’r ddau reswm fel bwyd a gafodd ei daflu oherwydd ‘na chafodd ei ddefnyddio mewn pryd’ ac felly gyda’i gilydd mae’n cyfrif am 33% o’r holl fwyd sy’n cael ei wastraffu. Gellir defnyddio’r rhesymau hyn i roi amcan o ba ymddygiadau allai leihau gwastraff bwyd.
Download files
By downloading resources you are agreeing to use them according to our terms and conditions.
These files may not be suitable for users of assistive technology.
-
DownloadCrynodeb Gweithredol Gwastraff Bwyd a Diod Cartrefi yng Nghymru 2021-22
PDF, 471.49 KB